Macarrón de Narices

Xoán Babarro (Calvelo de Maceda, 1947) é escritor e lingüista. Licenciado en Filosofía e Letras, traballou constantemente pola introdución do galego na escola e pola recuperación e defensa da lingua galega en Asturias, onde desenvolveu o seu labor docente ata 1971, cando se trasladou a Galicia. É membro da Real Academia Galega desde 2002. Como narrador infantil dáse a coñecer e 1974 con «Zoca zoqueira» (primeiro premio de contos O Facho). Con Ana M.ª Fernández consegue o premio O Facho de teatro en 1983 (coa obra «Grande invento para saír do aburrimento») e O Barco de Vapor en 1985 (por «Primeiro libro con Malola») e en 1989 («Barrigaverde e o dragón Achís»). Gaña o VII Premio de Literatura Infantil e Xuvenil Pura e Dora Vázquez con «Palabra era un universo paralelo» (2010) e a quinta edición do Premio Arume de Poesía con «A Princesa de Taramundi» (2010). As súas obras traducíronse ao catalán, chinés, coreano, grego e portugués. No catálogo de Xerais ten publicadoss os seguintes títulos: «Carpametacarpadeduna» (2001), «Macarrón de Narices» (2011) e «Garabitolas» (2023).

Marcos Calo (A Coruña, 1974) comezou a dedicarse profesionalmente ao debuxo despois de cursar estudos de Belas Artes en Pontevedra. Os seus primeiros pasos foron na animación, máis notablemente traballando como deseñador de escenarios nos filmes "Planet 51" e "Despicable Me". Ao mesmo tempo, foi desenvolvendo a súa faceta como ilustrador de contos ata hoxe, no que a ilustración é a súa principal ocupación. Destacan os seus traballos para empresas norteamericanas como Harpercollins, Tor Books, Sterling Publishing ou Stone Arch Books. En Xerais ilustrou "Macarrón de Narices" (2011), "A Estrela de Oriente" (2012) e "O mundo máxico de Lía" (2020).