A Venus de cristal

Pietro Puliani é un afamado vidreiro veneciano que posúe grandes coñecementos sobre alquimia e poderes adiviñatorios aprendidos no Exipto. Todo o que rodea a figura de Pietro é un gran misterio: vive nun dos illotes de Venecia e habita un suntuoso palacio ao que case ninguén accedeu nunca; agocha a súa face baixo unha máscara carnavalesca; goza do respecto da alta nobreza e da protección do Dogo; ninguén sabe a súa idade e moitos pensan que é o mesmo demo. Pietro Puliani dedica a súa vida á busca da beleza e da inmortalidade femininas. Para dar con elas, frecuenta todos os bordeis da cidade na procura da rapaza que agoche no seu interior unha alma inmortal e bela.
Cunha prosa elaborada, que recrea ambientes preciosistas e ás veces oníricos, A venus de cristal, a novela coa que Chelo Suárez Muíños debuta na colección Xerais Narrativa, retrata con precisión descricións de escenas e lugares marabillosos e personaxes entre fantásticos e grotescos daquela Venecia do século XV, conducindo ao lector cun ritmo áxil polas súas páxinas.

Formato:

20,50 €

( impuestos incluidos )

SOBRE EL AUTOR/A

Chelo Suárez

Chelo Suárez Muíños nada na Coruña, no barrio de Santa Lucía, no seo dunha familia mariñeira. Medrou entre libros, moitos libros, cunchas e estrelas de mar. Asinou en diversas ocasións cos pseudónimos Amara Orzania e Puliana Marful. Foi colaboradora habitual de Radio Oleiros. Obra Narrativa: ''Flor de Xiz'', 2003, ''A Venus de cristal'', 2008, ''Os milagres de Cristamar'', 2008, ''As horas rotas'', 2010, ''A neve e o lume'' (próxima aparición). Poesía: ''Corpo de mar'', 2008, ''O arco da luz'', 2009, publicado en internet pola AELG. Obras colectivas: ''En defensa do Poleiro. A voz dos escritores galegos en Celanova'', 2010, ''Vivir un soño repetido''. Homenaxe a Lois Pereiro, 2011, libro electrónico da AELG. Premios: Premio de literatura erótica Narrativas Quentes no 2008, por Os milagres de Cristamar. Segundo premio do Modesto Figueiredo no 2008, por Colleita de sombras. Gañadora da XVII edición do premio Lueiro Rey no 2010, pola obra As horas rotas. Gañadora do premio Adiala de relato curto do Centro Galego de Mallorca no 2010, por Monólogo dun cadáver. Gañadora da XIII Edición do Certame de narración curta Ánxel Fole, no 2011, por Recendos. Finalista do Manuel Murguía no 2012, por Momentos de néboa e luz.