Celso Emilio Ferreiro, nacionalista galego

En «Celso Emilio Ferreiro, nacionalista galego» Luís Gonçales Blasco «Foz» propón unha achega ao comportamento político do poeta de Celanova: desde a súa vinculación co movemento nacionalista das Mocedades Galeguistas, até que foi expulsado da UPG e despois militou no PSG para, nos últimos anos de vida ingresar, de forma testemuñal, no PSOE. A obra, que trata tamén o contexto histórico, literario e social da biografía de Celso Emilio, así como da súa obra literaria, verte luz sobre certos lugares comúns reiterados noutro tipo de ensaios que pretenden afastalo da ideoloxía nacionalista.
Manexando documentación fidedigna, queda ben ás claras o percorrido de Celso Emilio Ferreiro no ámbito da UPG, desde a súa fundación até a súa expulsión, como tamén algúns capítulos nos cales o propio «Foz», autor deste libro, foi coprotagonista dos acontecementos.

Formato:

9,99 €

( impuestos incluidos )

SOBRE EL AUTOR/A

Luís Gonçales Blasco ''Foz''

Luís Gonçales Blasco «Foz» (Foz, 1941) é profesor de Lingua e literatura. A comezos da década de 1960 contacta co Grupo Brais Pinto en Madrid e en 1964 convértese nun dos membros fundadores da UPG. En 1968 pasa á clandestinidade e acaba por se exiliar en París, onde traballa na editorial Ruedo Ibérico e se licencia en Linguística Xeral. Pouco despois do seu regreso a Galicia en 1977, móvese na órbita do independentismo: participa na creación do Partido Galego do Proletariado, de Galiza Ceive, da primeira Frente Popular Galega, da Assembleia do Povo Unido... Na actualidade milita en Cerna e é membro da súa Coordenadora Nacional. Membro da AGAL e académico da Academia Galega da Língua Portuguesa, publicou traballos de lingua, literatura e historia política en «Agália» e noutras revistas. É autor do libro «A política e a organizaçom exterior da UPG (1964-1986)» (2012) e de «A UPG em Portugal e alguma coisa mais» (2022). Ademais, sobre Celso Emilio Ferreiro publicou os artigos «Anotaçons a propósito da UPG e do papel de C. E. Ferreiro e outros» e «Vida e obra de Emílio Ferreiro Miguez». «Celso Emilio Ferreiro, nacionalista galego» (Xerais, 2023) é a súa primeira obra na colección Crónica.