Debaixo dun parasol

Despois do longo inverno xa é posible sentir o cheiro salgado e húmido da praia, a pesar de haber tanta xente como para encher libros e libros coas súas historias. Alí cadaquén escolle un lugar para “ocupar” coma se fose a súa casa, coa súa veciñanza arredor, onde colocar cadanseu parasol, toalla e cadeira. E cadaquén busca como entreterse durante as longas horas de “tumbing”. Hai quen le, quen pasea, quen xoga na area, quen olla ao horizonte, quen escoita música, quen fala a todas horas polo móbil, quen practica raros deportes con pa e boliñas, quen toma un baño… E hai xente que simplemente observa. Debaixo dun parasol, tanto ten que sexa de flores ou estea enferruxado, coñécense moitas historias interesantes que se poden recoller nun diario de verán.

Formato:

14,50 €

( impuestos incluidos )

SOBRE EL AUTOR/A

Ignacio Hernández

Ignacio Hernández (A Coruña, 1988) é ilustrador pola Escola de Deseño Antonio Faílde de Ourense. Leva anos traballando para diversos colectivos e asociacións culturais aplicando as súas ilustracións a diferentes materiais gráficos. En Xerais ilustrou os libros «Quen dá a quenda?» (2016) de Héctor Cajaraville, «Debaixo dun parasol» (2017) de Azucena Arias Correa, «Somos os monstros» (2019, 2022) de Paula Carballeira, «A cidade dos desexos» (2023) de Agustín Fernández Paz e «Refugallo o espantallo», de Irene Alonso Gasalla; ademais de colaborar en diversas propostas de ámbito educativo.

Azucena Arias Correa

Azucena Arias Correa naceu en Sao Paulo, nunha terra algo afastada da que sería dende poucos anos máis tarde o seu fogar, Pontevedra. Mestra, licenciada en Ciencias da Educación, licenciada en Psicoloxía e doutora en Didáctica das Ciencias Experimentais. Exerce como mestra e orientadora no CEIP Vilaverde e é profesora asociada na Facultade de Ciencias da Educación e do Deporte da Universidade de Vigo. Membro da asociación de renovación pedagóxica "Colectivo ollo de sapo". Como autora de textos de literatura infantil e xuvenil publicou as seguintes obras: "A cirurxiá" (1998), "A casa do grilo e da chicharra" (2000), "A cadela e o óso" (2001) e "Debaixo dun parasol" (Xerais, 2017), ademais dalgúns textos na biblioteca virtual galega (www.bvg.udc.es) e poemas en obras de colaboración. Obtivo o primeiro premio no VI Concurso Literario Rosa de Cen Follas na modalidade de poesía coa obra "Silencio cómplice" (2013). No ámbito profesional ten publicadas varias obras en coautoría relacionadas coa cultura galega e propostas didácticas para a escola ("Festas anuais na escola", "As adiviñas", "O Magosto", "O Nadal"... ); tamén outras relacionadas coa metodoloxía, a didáctica e a innovación ("Traballar por proxectos nas aulas de infantil e primaria", "O proceso de adaptación... ¿E ti vas á escola?", "O traballo por proxectos en infantil, primaria e secundaria"...), coa perspectiva de xénero na educación ("A igualdade como solución"...), coa animación á lectura... ademais de numerosos artigos para diversas revistas e xornais.

❮ ❯