Galicia contada aos non galeguistas

Manuel Veiga Taboada (Monforte de Lemos, 1960) é doutor en Ciencias Políticas e Socioloxía e licenciado en Ciencias da Información. En 1983 entrou a formar parte da redacción do semanario «A Nosa Terra», periódico que dirixiu entre 2007 e 2010. No ano 2004 gañou o premio Xerais coa novela «O exiliado e a primavera» e, en 2006, o Manuel García Barros con «Lois e Helena buscándose un día de tormenta». Outras obras súas son «O profesor de vegliota», novela (Xerais, 2008), «Do G ao Z. Dicionario indignado e humorístico» (Xerais, 2012) , «O pacto galego na construción de España», «Manuel María, buscando un país» (Xerais, 2016), «Todo ser humano é un río» (Xerais, 2016), «A parte queimada. Stalin & Robespierre», «As mellores tendas de Madrid» (Xerais, 2021) e «Perder as bestas» (Xerais, 2023). Colabora en «Nós Diario» e no blog «Biosbardia». (Foto do autor: Antonio Gutiérrez)

O meu nome é Alejandro Viñuela Agra (Jano). Nacín na Coruña en 1979. Licencieime en Belas Artes e estiven de beca Erasmus en Bergen (Noruega), tamén estudiei Ilustración na Escola Massana de Barcelona. Traballo coma deseñador gráfico, historietista e ilustrador para diversas empresas e en diferentes eidos como o debuxo de historietas con varios traballos publicados en Bang! Ediciones, Autsaider Comics, Demo Editorial ou Revista Mongolia, e sobre todo, en encargos de ilustración para publicacións como Monocle Magazine, Daily Telegraph, Revista El Malpensante...editoriais como Ir Indo, Alfabia ou entidades como A Mesa e a Fundación Barrié. Tamén desenvolvo unha actividade como docente en obradoiros de narrativa gráfica dirixido a nenos e nenas. Gañei algúns premios como o Injuve no 2002, o Certame Ourense no 2003 ou o Golden Globos 2011. En Agosto de 2014 tiven a sorte de ser un dos invitados ao festival Viñetas desde O Atlántico en A Coruña. Máis información en: http://janoilustracion.blogspot.com.es