Unha gorxa chea de paxaros

Os Carunchos é un grupo de música galega nacido no ano 1994 coa idea de mesturar temas cantados con pezas de gaiteiros solistas e que foi conformando un amplo repertorio no que os temas de nova creación, así como as versións musicadas de poemas referenciais da literatura galega adquiren un enorme protagonismo. Coplas vellas e novas, poemas de autores como Rosalía de Castro, Celso Emilio Ferreiro, Eduardo Blanco Amor, Manuel María... Melodías de ritmos, tonalidades e instrumentacións variadas... Nos seus directos ofrecen unha interpretación actual da música galega sustentada na variedade de timbres e tonalidades sen esquecer nunca as orixes e sempre intentando crear un ambiente de festa en que o público se sinta partícipe. Levan publicados os seguintes traballos discográficos: «¡Ala, que vai!» (1998), ¡Sen tempo non era! (2002), «Montealegre» (2005), «En galego» (2009), «Ti que?» (2013), «Cantares» (2017), «Lingua de xigantes» (2021) e «Unha gorxa chea de paxaros» (Xerais, 2024), libro-disco de celebración do seu trixésimo aniversario no que homenaxean a Manuel María, o gran poeta chairego, reinterpretándoo dende a tradición, a música popular, e imprimíndolle o seu inconfundible selo.

Licenciada en Belas Artes, comeza no eido da ilustración profesional á vez que se incorpora á veterana banda de rock Zënzar. Este feito fai que moitos dos proxectos creativos e de investigación en que traballa teñan relación coa música. É ilustradora do proxecto de rock infantil Pakolas, tanto dos libros como debuxando en directo no espectáculo Cores, contos e rock'n'roll. En 2017 comeza Músicas Galegas Ilustradas, un proxecto onde visibiliza o papel da muller na música galega e que foi recoñecido co premio Martín Códax da Música 2020. É coautora do libro Ferreñas & Rock'n'roll xunto con Iria Pedreira. Preside a Asociación Galega de Profesionais da Ilustración (AGPI) desde o ano 2022. En Xerais, é autora das ilustracións de «Luísa Villalta, melodía de palabras» (Xerais 2023); «Unha gorxa chea de paxaros» (Xerais 2024), «Milú e o edificio das persoas extraordinarias» (Xerais 2024) e «Tacón, punta, tacón» (2025).