Universo diverso. Unha viaxe pola galaxia LGBTIQA+

Eva Mejuto (Sanxenxo, 1975) estudou Xornalismo na USC e traballou no sector editorial infantil desde 1998 ata 2016, primeiro en Kalandraka e despois en OQO. Actualmente forma parte do proxecto Capicúa de xestión cultural. Foi docente durante dez anos no máster «Libro ilustrado e animación audiovisual» da Universidade de Vigo e fixo a súa tese de doutoramento sobre o realismo social no álbum ilustrado. É autora de diversas adaptacións de contos tradicionais para formato álbum ilustrado, traducidas a máis de dez idiomas. En Xerais ten publicadas as novelas «22 segundos» (2017), «'Memoria do silencio» (2019), «A ladroa da biblioteca de Meirás» (2022), coas cales quedou finalista do Premio Jules Verne de Literatura Xuvenil, así como a novela infantil «O día que choveron gatos» (2023) (obra finalista do Premio Merlín en 2022) e o álbum ilustrado por Víctor Rivas «Dez gatiñas viaxeiras» (2019). Xunto á ilustradora Bea Gregores publicou os álbums «A lavandeira de San Simón» (Xerais, 2020) e «Cando leo» (Xerais, 2022). En 2025 publica, xunto con Lucía Cobo, o álbum«Sei cantar e sei baila» e mais a obra coa que gaña en 2024 o VIII Premio Agustín Fernández Paz pola Igualdade: «Queco e Kik» (Xerais, 2025). É autora do álbum ilustrado «Os fíos de Begoña. Unha biografía de Begoña Caamaño» (Xerais, 2026), con ilustracións de Nuria Díaz. Con Nee Barros e Julia Lago, publica o álbum ilustrado de divulgación «Universo diverso. Unha viaxe pola galaxia LGBTIQA+» (Xerais, 2026).

Julia Lago é graduada en Belas Artes pola Universidade de Vigo, cun máster en Ilustración e Deseño pola Politécnica de Valencia. Combina a produción propia con proxectos editoriais e publicitarios. O seu primeiro cómic, «Nós seis», foi galardoado co XVI Premio Castelao de Banda Deseñada. No ano 2022 abriu na Coruña a galería Grelería, un espazo especializado en obra gráfica e outras artesanías contemporáneas que foi merecedor das axudas Injuve pola Creación Joven. En Xerais, é autora das ilustracións das novelas «Ánxela e Spencer» (2023) e «O Concurso dos Mellores Inventos (e outros incribles acontecementos)» (2024).

Nee Barros (2002) é divulgador cultural, escritore e activista LGBTIQA+. Como divulgador, traballa en diversas redes sociais baixo o nome de @neeumatiko. Alí recomenda libros en galego, especialmente aqueles con representación LGBTIQA+. Como activista LGBTIQA+, fai pedagoxía nas redes sociais, en centros de ensino e no seu día a día. Como escritore, publicou a obra de teatro «Identidade», sobre a realidade trans, e a novela «Nom estamos quebrades», que explora a sexualidade e o autismo. Así mesmo, coordinou a antoloxía de relatos LGBTIQA+ «Alguén nos lembrará» (Xerais, 2023), participou noutras publicacións colectivas e é tradutore para o galego dos volumes da serie de BD «Heartstopper», editados por Xerais. En 2026 publica, xunto a Eva Mejuto e Julia Lago, o álbum ilustrado de divulgación «Universo diverso. Unha viaxe pola galaxia LGBTIQA+» (Xerais, 2026).