Vento e chuvia

Premio Xosefa Iglesias Vilarelle ao Libro Educativo, 2013.
Nun territorio extenso, misterioso e brutal no que aínda hoxe vivimos, os deuses conviviron cos homes, beberon da súa cervexa, participaron das súas batallas, exiliáronse nos seus montes. Nas vellas aldeas, na noite dos castros, hai máis de dous mil anos, alí onde hoxe vemos mudas ruínas circulares e murallas derrubadas, contáronse historias fermosas transmitidas de xeración en xeración. Historias de deuses que viven, que nacen, choran, aman, sangran, viaxan de monte en bosque, e das illas ás costas; historias nas que non existen fronteiras entre o real e o fantástico, porque, coma no tempo de hoxe, o mundo dos homes é sobre todo imaxinación. Deuses e homes corren baixo a chuvia, e as súas palabras son levadas polo vento e as augas, que son a cerna de Galicia. Manuel Gago imaxina os soños, as lendas e os mitos da Idade do Ferro, como un reporteiro de viaxes que leva a súa gravadora ao interior destas cabanas castrexas. Un minucioso traballo de documentación histórica foi o paso previo para deixar voar a imaxinación e entrar nun universo cultural mítico, onde o vento e a chuvia nos traen versos, memorias e a recuperación de centos de nomes de persoas, cidades e seres míticos da Galicia previa á invasión romana, ata agora descoñecidos polo gran público. As ilustracións de Manel Cráneo recrean este mundo con formas e cores poderosas que nos fan viaxar no tempo.

Formato:

8,49 €

( impuestos incluidos )

SOBRE EL AUTOR/A

Manuel Gago

Manuel Gago (Palmeira, Ribeira, 1976) é vilego, da Pobra do Caramiñal. Dirixe «culturagalega.gal», a plataforma de divulgación do Consello da Cultura Galega, e é profesor de Comunicación na Universidade de Santiago de Compostela. Como divulgador científico e histórico, leva promovido numerosos proxectos de posta en valor do patrimonio cultural e comisariado exposicións nas cales explora a confluencia entre cultura e tecnoloxía. Ensaísta e narrador, publicou «Herdeiros pola forza. Poder, patrimonio cultural e sociedade na Galicia do século XXI» e os libros de ficción «Vento e chuvia. Mitoloxía da antiga Gallaecia» (Xerais, 2013, 2015), «O anxo negro» (Xerais, 2016), «O exército de fume» (Xerais, 2018) e «Nus» (Xerais, 2021). Mantén o blog «Capítulo Cero» (www.capitulocero.org). (Foto do autor: Sole Felloza)

Manel Cráneo

Manel Cráneo (A Coruña, 1973). Artista multidisciplinar de ampla bagaxe, comezou o seu periplo profesional a principios dos 90. Como autor de banda deseñada, centos de páxinas súas apareceron en publicacións como BD Banda, Barsowia, Dos Veces Breve, GPS, Ovo, Costra de Postre, Os Rústicos da Gadaña, Bravú, Subterfuge Comics, Interea Visual ou Boletín Galego de Literatura. Publicou a serie "Planeta Mincha - Estudos Xeográficos" nas revistas Caña e Viralatas e, anteriormente, "A Fraga Milmañas" en Golfiño. Tamén os álbums Dámsmitt (Dibbuks, 2006), Os lobos de Moeche (Demo Editorial, 2009), Cousas de Mortos (Demo Editorial, 2012), A torre dos Mouros (Demo Editorial, 2012) e colaborou en volumes colectivos como a bd promocional Fito y Fitipaldis (Dro Eastwest), Artículo 20 (Astiberri) ou H2OIL (Colectivo Chapapote). A súa bd cómic Ladróns de cadáveres foi adaptada a curtametraxe. Recentemente produciu un capítulo piloto para serie de animación baseado no seu universo persoal Planeta Mincha. Como ilustrador traballou para diferentes editoriais como Richmond Publishing, Usborne, Santillana, Galaxia, Xerais ou Everest, entre outras. A súa obra foi exposta en numerosas mostras por España, Portugal, Francia e Cuba. Entre os seus premios destaca o Nacional de Cómic sobre Vida y Obra de Federico García Lorca (Granada, 1998). Foi presidente da AGPI (Asociación Galega de Profesionais da Ilustración) e vicepresidente de FADIP (Federación de Asociaciones de Ilustradores Profesionales), comisario de diversas mostras e exposicións e director e propietario de Demo Editorial e da empresa de xestión cultural CR4neo. Deu máis de 350 charlas e conferencias sobre diversos temas nos últimos 20 anos. Na súa faceta musical formou parte de bandas de punk-rock como Vampiraos, 13:31 ou Error! e actualmente dedícase á experimentación musical compoñendo música mincha. A súa vinculación co mundo audiovisual e o sector publicitario levounoo a colaborar en infinidade de proxectos e longametraxes realizando diferentes funcións, desde story-boarder ata guionista ou director de arte.

❮ ❯