Antía e Daren

Miguel Porto (Vigo, 1980), licenciado en Belas Artes, traballa no eido da ilustración e a banda deseñada. Dende 2012 combina estas actividades co labor docente na escola de banda deseñada O Garaxe Hermético. En 2014 creou o festival de debuxo do natural no rural Bosquexo, onde segue exercendo como director e organizador. A súa sinatura aparece en numerosas publicacións de banda deseñada. Seus son os álbums de BD «Tirant lo Blanc» (2008), «Allen son of Hellcock» (para o mercado dos EEUU, con guión de William Tracy e Gabe Koplowitz, 2017) ou «Subnormal, una historia de acoso escolar» (con guión de Fernando Llor, 2020). Como ilustrador traballa sobre todo en libros de texto e LIX para diversas editoriais. Tamén fai ilustración en prensa, storyboards para publicidade ou cartelería para diversas produtoras.

Nacido en Cures-Vimianzo (A Coruña), Valentín Alvite é licenciado en Filoloxía Galego-portuguesa e traballou durante anos como profesor de Lingua Galega e Literatura no ensino secundario. Compaxinou ese labor coa creación literaria, realizando tamén ocasionalmente guións de televisión. Froito desa actividade foron as novelas «O hotel» (2009), premio de Relato de Aventuras Antón Avilés de Taramancos, ou «Relatos para sorrir» (2017), conxunto de narracións de carácter humorístico. Cultivou igualmente o microrrelato, resultando gañador do Premio de Microrrelatos Lonxa Literaria (Moaña) en 2005. En 2019 gañou o Premio Raíña Lupa con «Antía e Daren. O misterio dos torques roubados» (Xerais 2020).