As Sentinelas do Silencio

Beatriz Maceda. Naceu e vive na Coruña, mais pasou unha parte importante da súa vida na capital da Terra Chá, Vilalba. É mestra de Educación Primaria pola especialidade de Lingua Inglesa. Realizou estudos de posgrao en Orientación Educativa no Instituto Maslow Catell da Universidade de Deusto. Leva exercendo o ensino desde hai vinte e un anos, impartindo cursos e facendo traballos sobre ensino global. Publica os primeiros relatos, «Ela» e «Tuerka 27», na revista «Tempos Dixital». Logo virían o álbum ilustrado «Man. O alemán de Camelle» (2012), coa intención de achegar a figura de Manfred Gnädinger á mocidade; «O álbum de Garrincha» (2015), unha historia sobre como o deporte, neste caso o fútbol, pode ser un elemento de integración para as nenas e nenos migrantes, e «Cando John Lennon coñeceu a Valle-Inclán» (2017), que aproxima a figura de Valle á rapazada. En 2019 publica «Lúa en Ningures», o seu primeiro libro na colección Merlín de Xerais, ao que seguiu «As sentinelas do silencio» (2022). Xunto á escritora Eli Ríos e á ilustradora Laura Suárez, publica o álbum ilustrado «Luísa Villalta. Alma de violino» (Xerais, 2023). Tamén «Teranga» (Xerais, 2024) na colección Fóra de xogo de Xerais.

Laura Veleiro Suárez (Xixón, 1970). Escritora e ilustradora. Despois de rematar os estudos de Xeografía e Historia na Universidade Complutense de Madrid inicia a súa andaina no mundo editorial como redactora, labor que compaxina coa docencia. A ilustración e a escrita son as súas paixóns, polo que publicou proxectos individuais como «Nubeman», «Qué hace ahí la Luna», «O paxariño do limoeiro» ou «Las nuevas aventuras de Nubeman». Tamén colaborou con Beatriz Maceda Abeleira ilustrando «Man, o alemán de Camelle», «O álbum de Garrincha» e, en Xerais, «Lúa en Ningures» (2019) e «As sentinelas do silencio» (2022).