Cousas de papá

Nacín en Velle, a carón de Ourense e do Miño, no outono de 1966, en plena vendima, no seo dunha familia comerciante e un chisco nómade, porque o meu avó fora paraugueiro e, máis tarde, cando decidiu dedicarse á venda e reparación de reloxos e xoias, feirante. Inicieme na vida literaria indo polas feiras de toda Galicia acompañando o meu avó e o meu tío Miguel, e tamén, claro, na tenda de ultramarinos que posuía a familia en Velle (e que, hoxe reconvertida en bar, aínda rexenta a miña nai). Son pois, desde o principio, vendimador, feirante e camareiro, e apaixonado do futbolín e dos reloxos. Estudei Filoloxía Clásica e dei en escribir libros e traducir o que outros escribiron a esa nosa lingua tan saborosa que, cando neno, fun escoitando de feira en feira. Publiquei como poeta Choiva, vapor e velocidade (1999), A casa deshabitada da familia Pena (2001), Verba quae supersunt (2003) e Tratado de zooloxía para corazóns mancados (2009); e, como tradutor, Libellus de natura animalium (1999), Cantos e fragmentos de Safo (2008) e Unha rosa encarnada, Antoloxía de Robert Burns (2014). Gañei ademais o I Premio de Poesía Xosé María Díaz Castro co libro Máscaras de espellos (2016). Participei en varios volumes colectivos e síntome tan orgulloso disto como dos meus libros individuais, porque a miña participación sempre foi en favor de causas boas e xenerosas. Vivo de dar clases de Latín e Grego no IES de Valga, e encántame.

Nacín en Burgos no ano 1967. Estudei Belas Artes en Salamanca e despois traballei en diferentes axencias de publicidade en Madrid e Burgos... ata que cheguei a Galicia. Xa nesta terra comecei a dar clase en distintos institutos de secundaria por diferentes recunchos de Galicia, sempre mirando o mar. Compaxinei esta actividade con traballos de deseño gráfico: anagramas, carteis de títeres e teatro, colaborando en moitas ocasións coa compañía Talía Teatro, así como coa ilustración de contos para nenos, que é o que máis me gusta. Entre os meus traballos publicados están as ilustracións de "Menos Lobos", "Hip-Hip, Hurra!", "O armario de Ana", "Paco" e "Cousas de papá" (Xerais, 2016).

Este músico compostelán ten participado en diferentes proxectos musicais nos últimos anos, como a gravación do disco "Haikus" coa cantante Najla Shami (2011) ou a xira presentación do álbum "Rosalía pequeniña" coa cantante Uxía e o músico Santi Cribeiro, na cal realizou máis de trinta concertos por toda Galicia no ano 2013. En 2014 xira co espectáculo "Un paso sempre adiante" creado a partir de poemas musicados de Xosé Mª Díaz Castro e, en 2015, participa, xunto con Magín Blanco e Uxía, no espectáculo "Canta o cuco", baseado en poemas de Manuel María. No libro-disco "Cousas de papá" (Xerais 2016) Héctor Lorenzo musica e interpreta dez dos dezasete poemas de Raúl Gómez Pato que conforman o poemario.