Dicionario da nova literatura galega

Este Dicionario da nova literatura comezou a fraguarse a finais da década dos anos sesenta do pasado século a través dunha enquisa que o profesor Xesús Alonso Montero deu en distribuír entre as persoas do mundo literario galego que non tivesen obra publicada antes do ano 1936.
Velaquí hoxe, máis de cincuenta anos despois, aquel proxecto en forma de libro. Oitenta e seis persoas responderon aquelas preguntas ideadas por Alonso Montero que permiten coñecer multitude de datos biográficos e, ao tempo, deseñan as preocupacións e expectativas dun tempo moi concreto da nosa historia literaria e cultural. Este singular dicionario, en edición de Ramón Nicolás, posibilita preguntarse que cambiou na cultura galega nestes últimos cincuenta anos e engade, ademais, unha rica e valiosa documentación bibliográfica e epistolar, alén doutros documentos de inequívoco interese para reconstruír percorridos biográficos e literarios concretos mais tamén desvela as claves dun tempo que se proxecta nos nosos días.

Formato:

18,95 €

( impuestos incluidos )

SOBRE EL AUTOR/A

Xesús Alonso Montero

Xesús Alonso Montero (Vigo, 1928), catedrático de Literatura na Universidade de Santiago de Compostela e membro da Real Academia Galega, é filólogo, traductor, conferenciante e autor de numerosos libros, estudios e traballos entre os que cabe destacar: "Cen anos de literatura galega" (1964), "Informe -dramático- sobre la lengua gallega" (1973), "Celso Emilio Ferreiro" (1982), "Luís Pimentel: biografía da súa poesía" (1990), "Decálogo da lingua galega" (1990), "Informe(s) sobre a lingua galega (presente e pasado)" (1991), "As palabras no exilio. Biografía intelectual de Luís Seoane" (Xerais 1994, 2002), "Ensaios breves de literatura e política" (1996), "Curros Enríquez no Franquismo (1936-1971)" (2003) e "A Batalla de Montevideo. Os agravios lingüísticos denunciados na Unesco en 1954" (Xerais 2003). Como poeta ten publicado, entre outras: "Versos satíricos ó xeito medieval" (2002), "Versos republicanos" (2002). Unha escolma da súa obra xornalística foi recollida en "Beatus qui legit: artigos periodísticos (1998-1999)" (2000), publicación con motivo da concesión do Premio Roberto Blanco Torres 2000. Preparou diversas compilacións poéticas de homenaxe a autores da literatura galega: "Coroa poética para Rosalía de Castro" (Xerais 1985), "Coroa poética para Castelao" (Xerais 1988), "Coroa poética para un mártir" (Xerais 1996), Coroa literaria para Roberto Blanco Torres contra a súa morte (1999) e "47 poetas de hoxe cantan a Curros Enríquez" (Xerais 2001).

Ramón Nicolás

Ramón Nicolás (Vigo, 1966) é profesor e crítico literario. Escribe semanalmente nas páxinas do suplemento Fugas de "La Voz de Galicia" e con asiduidade no blog literario Caderno da crítica. É membro da Fundación Celso Emilio Ferreiro e doutras asociacións críticas e literarias, alén de dirixir a colección Biblioteca das Letras Galegas de Xerais. Asinou diversas traducións e ensaios, ademais de estudar a obra de autores como Manuel Luís Acuña, Manuel Lueiro Rey, Álvaro Cunqueiro, Ramón Cabanillas, Lugrís Freire ou Celso Emilio Ferreiro. Os seus últimos libros foron a biografía "Onde o mundo se chama Celso Emilio Ferreiro" (Xerais, 2012), "Antoloxía do Rexurdimento" (Xerais, 2024) e as novelas "O espello do mundo" (Xerais, 2016) e "Lapis na noite" (Xerais, 2018). Foto de Anxo Cabada

❮ ❯