O triángulo vermello

Licenciada en Filosofía e Ciencias da Educación e Xornalismo. Foi redactora no semanario «A Nosa Terra» e formou parte da redacción de «Sermos Galiza». Tamén formou parte da Comisión de Igualdade do Consello da Cultura Galega. Como autora, centrouse especialmente en publicacións encamiñadas a recuperar a memoria das mulleres; entre elas, a biografía de Maruxa Mallo ou os estudos biográficos dos libros memorialísticos «Diarios» de Syra Alonso ou «Cárcere de Ventas» de Mercedes Núñez. Publicou tamén «M.ª Luz Morales, a grande dama do xornalismo» e, xunto con David Barro, o libro de entrevistas «Voces de Atlántica». En 2024 publica, xunto con Pablo Iglesias Núñez, o álbum «O triángulo vermello» (Xerais, 2024), dedicado á figura de Mercedes Núñez e ilustrado por Belén Diz Juncal. Os dereitos de autora deste libro van destinados a organizacións de apoio á infancia de Gaza, Palestina.

Belén Diz Juncal (1993) vive en Pontevedra. Graduada en Belas Artes pola Universidade de Vigo e posteriormente titulada no máster de álbum ilustrado e animación audiovisual na mesma universidade, dedícase a consumir bolígrafos, raiando nun papel realidades que pretenden completar a súa propia. O seu traballo engloba diferentes temas e disciplinas, entre as que destacan a idea da infancia, o corpo e o fogar como refuxio, na que se pretende representar ese espazo que nos fai sentir seguros por medio de escenas onde o propio corpo, a mirada e o contexto reflicten un imaxinario construído a partir de recordos, sensacións e sentimentos. En Xerais, é autora das ilustracións do álbum «O triángulo vermello» (2024).

Pablo Iglesias Núñez (París, 1949) é fillo da política republicana Mercedes Núñez Targa e ten traballado en favor da memoria de todas aquelas persoas que viviron e loitaron durante a guerra civil e que máis tarde sufriron deportación nos campos nazis. Verdadeiro albacea da memoria de Mercedes Núñez, en 2024 publica xunto con Carme Vidal o álbum ilustrado «O triángulo vermello», unha biografía emocional da súa nai, loitadora polas liberdades e supervivente do fascismo. Os dereitos de autor deste libro van destinados a organizacións de apoio á infancia de Gaza, Palestina.