Onde bate o mar

En diferentes puntos do litoral das Rías Baixas, despois dunha noite de treboada, aparecen os cadáveres dun experimentado navegante danés e dun veterano percebeiro de Baiona. As sorprendentes coincidencias entre eles e as circunstancias das súas mortes provocarán moita confusión na investigación que levan a cabo o inspector Antúnez, da Policía Nacional de Vigo, e a tenenta Lomba, da Garda Civil de Baiona.
O que nun inicio son dous accidentes no mar, axiña se revela como un quebracabezas de rancores, morte e vinganzas que percorren xeracións. O pasado viquingo da vila baionesa, unha foca que perdeu o rumbo en augas galegas, un antigo e desgraciado naufraxio e un Porsche Panamera tecen unha trama da que emerxe a verdade, como un cadáver, cando cesa o temporal.
Raquel Fernández constrúe en «Onde bate o mar» unha emocionante novela de intriga, onde a psicoloxía dos personaxes é perfilada con buril aguzado e onde o territorio é parte imprescindible da historia.

Precio:

18,95 €

( impuestos incluidos )

SOBRE EL AUTOR/A

Raquel Fernández

Raquel Fernández Fernández (Nigrán, 1972) exerce como «chef» nun restaurante da súa propiedade no Val Miñor. A pesar do afastado do mundo literario que poida parecer o seu día a día, a literatura e a escrita sempre formaron parte da súa vida. Ao longo dos últimos anos conseguiu máis dunha quincena de diferentes premios polo seu labor poético e narrativo, entre eles o Certame Literario do Concello de Ames (2020) nas modalidades poesía e narrativa, o segundo premio de poesía do certame Manuel Orestes Rodríguez do Concello de Paradela (2020), o primeiro premio de Relato Curto en Prol da Igualdade do Concello de Melide (2021), o Certame de Microrrelatos do Concello de Vilalba (2020, 2022, 2023) ou o Premio de narrativa do concurso Literario Xaime Illa Couto (2022). En marzo de 2024 publicou a novela «Contas de Buxo», dirixida ao público xuvenil. En xuño dese mesmo ano resultou gañadora do XVI Premio Jules Verne de Literatura Xuvenil con «I'm Obélix» (Xerais, 2024). «Onde bate o mar» (Xerais, 2026) é a súa primeira novela para lectorado adulto.