Rosalíate

Laura Suárez (Dumbría, 1994) medrou entre os cómics e libros ilustrados que lle regalaban os seus pais, de aí a súa paixón pola literatura e o debuxo. É graduada en Belas Artes pola Universidade Politécnica de Valencia e cursou o Máster de Ilustración e Cómic da escola Elisava de Barcelona. A súas ilustracións foron publicadas en medios divulgativos como Time Out ou 180 hilos, e educativos, como a revista Cocoter. Actualmente traballa como ilustradora literaria para diversas editoriais. En Xerais, é a autora das ilustracións dos libros «Conexión Macarrón» (2019), «Unha veciña de película» (2023), «A excursión a Cans. Unha veciña de película» (2025) e «Rosalíate. Pequena biografía de Rosalía de Castro (2026).

Uxía Martínez Recamán naceu nunha aldea do Morrazo en 1965, nunha familia de mariñeiros que, ao pouco da súa chegada, se mudará á cidade de Vigo. Nesta cidade comezou os estudos universitarios e despois trasladouse a Santiago para rematalos na Facultade de Filoloxía da USC que, por entón, comezaba a súa andaina na licenciatura de Galego-Portugués. Ao finalizar os estudos, dedicouse ao ensino de Lingua e Literatura en centros de secundaria por toda Galicia. Co tempo, comezou a traballar no sector editorial realizando distintas funcións como a edición e a autoría, sempre arredor do libro educativo de Lingua Galega. En 2026 publica «Rosalíate. Pequena biografía de Rosalía de Castro», unha biografía infantil, en formato álbum, con ilustracións de Laura Suárez.