De príncipes, princesas e outras andrómenas

Miguel Anxo Alonso Diz (Madrid, 1976). Licenciado en Economía, compatibiliza o exercicio da docencia coa súa actividade literaria e con diversas colaboracións en Radio Allariz e en varios blogs. Ten participado en numerosas iniciativas culturais en Galicia e Portugal, así como na meirande parte dos festivais de poesía que se organizan en Galicia. Destaca o seu labor como contacontos, así como as súas colaboracións cos servizos de dinamización lingüística de diversos concellos e centros educativos, tanto como contador de historias como impartindo obradoiros de poesía e de escrita. En 2012 deuse a coñecer no eido da literatura infantil e xuvenil xunto á ilustradora Luz Beloso coa obra «O cullarapo Croque». Outros títulos seus son «A nena á que non deixaban ser feliz»; «O soño de Esther»; «O valente coello que quixo soñar», «Mel, unha mosca agradecida» ou «O país da choiva». En 2017 obtivo o Premio Paraugas do Clúster de Comunicación de Galicia ao libro infantil do ano xunto a Xosé Tomás. En Xerais ten publicadas as novelas infantís «Música no faiado» (2018), «Instrucións para ler este libro» (2022), «Axencia Galega de Asuntos Máxicos» (2024) e «De príncipes, princesas e outras andrómenas» (2025).

Luz Beloso (Monforte de Lemos, 1968) é pintora e ilustradora. Licenciada en Belas Artes Universidade de Salamanca, é profesora de Secundaria das materias de Educación Plástica e Audiovisual e de Artes desde 1993. Impartiu obradoiros, cursos de formación a profesorado e palestras sobre proxectos e experiencias de aula en diferentes eventos e encontros educativos. Ten unha ampla traxectoria como ilustradora de libros infantís e xuvenís, e recolleu numerosos premios tanto no ámbito da ilustración como no educativo. En Xerais, é autora das ilustracións de «Instrucións para ler este libro» (2022) e «De príncipes, princesas e outras andrómenas» (2025).