Caderno do Nilo

En Caderno do Nilo o poema adéntrase na historia da humanidade, nacida do río, a través dunha viaxe sen meta que é unha viaxe ao tempo, a constatación de como se habitou a natureza nun deserto abafado de luz.
Este periplo poético conduce ao centro da soidade, transida pola beleza, e constitúese nun itinerario transformador, que estimula no poeta a interrogación e procura «buscar algo que amar. Facer da viaxe morada».
A través das páxinas de Caderno do Nilo percíbese unha viaxe poética ao tempo e simultaneamente unha estadía fóra do tempo que se relambe na aprendizaxe, na frescura da pedra fría que foi fogar dos deuses, e que permite habitar descoñecidos desertos que agochamos no noso interior.
Só na megápole do Cairo aparece o cotián, convivindo o pasado, o presente e o futuro nun corpo vivo con feridas e cicatrices.
Logo da viaxe, o poeta resulta transformado porque o Nilo que atravesa o deserto sedimenta na súa alma un desexo de nudez.

Precio:

20,95 €

( impuestos incluidos )

SOBRE EL AUTOR/A

Cesáreo Sánchez Iglesias

Cesáreo Sánchez Iglesias (1951) publicou en 1978 o poemario «Silencios e conversas de Inverno». Logo virían «Antonte das salamántigas» (1980), «O cántico da fonte» (1982), «Ortigas da memória» (1985), «Mar do fin da terra» (1987), «A árvore das sete palavras» (1989), «Do olvido o río» (1993), «O rostro da terra» (1996), «A escrita do silencio: Antoloxía persoal» (1997), «Evadne» (1999), «O rumor do distante» (Premio Esquío 2000), «Variacións nube» (2004), «Escrita luz» (2006), «O paraíso das sombras» (2009), «Caderno do Nilo» (Xerais, 2013, Premio Antón Losada Diéguez 2014), «Tempo transfigurado» (2017), «As bolboretas do Mekong» (Xerais, 2018), «A árbore que dá as lágrimas de Shiva» (Xerais, 2022) e «A lúa nas cerdeiras de Hiroshima» (Xerais, 2027). É presidente da Asociación de Escritoras e Escritores en Lingua Galega (AELG).